ಚೈತ್ರಪಥ

ಕತ್ತಲಲ್ಲಿ ದ್ವೈತವಿಲ್ಲ

raaghavam@gmail.com (Raghavendra) — Wed, 30 Sep 2009 06:35:00 +0000

ಕತ್ತಲಿಲ್ಲದೇ ಬೆಳಕಿಲ್ಲ,

ಅಪರಿಮಿತ ಕತ್ತಲಿಂದ ಹುಟ್ಟಿದಂತೆ ಬೆಳಕು

ನನ್ನೆದೆಯ ನಿರಾಕಾರ ಪ್ರೇಮವೇ,

ಸಾಕಾರರೂಪತಾಳುತ್ತದೆ, ನಿನ್ನ ಬಯಸುತ್ತದೆ.

ಗಾಢ ಕತ್ತಲೆಯಂತ ನಿರಾಕಾರರೂಪಿ ಒಲವಲ್ಲಿಲ್ಲ ಬಯಕೆ,

ಅದು ಪಡೆದು ತೃಪ್ತ.

ಬೆಳಕೆಂದರೆ ವಿರಹ,

ಮುಂಜಾನೆ ಹುಟ್ಟಿ, ಆಗಸಕ್ಕೇರಿ

ಮೆಲ್ಲ ಸಂಜೆಗೆ, ಕತ್ತಲಿನ ಮಡಿಲಿಗೆ ಸೇರುತ್ತದೆ,

ಕತ್ತಲಲ್ಲಿ ದ್ವೈತವಿಲ್ಲ.

mobile photos

raaghavam@gmail.com (Raghavendra) — Sun, 20 Sep 2009 13:06:00 +0000

ಕ್ಯಾಮರಾ ಹಿಡಿಯಲು ಪ್ರಯತ್ನಿಸುತ್ತಾ...

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Mon, 24 Aug 2009 03:52:00 +0000

ಚಿತ್ರದುರ್ಗದ ವಿಂಡ್‌ಮಿಲ್‌ಗಳು, ಬಸ್ಸಿನಿಂದ ಮೊಬೈಲ್‌ನಲ್ಲಿ ತೆಗೆದಿದ್ದು..

ಚಿತ್ರದುರ್ಗದ ಗುಹೆಯ ಶಿವಲಿಂಗಗಳು...

ಟೆರೇಸ್ ಮೇಲಿಂದ..

ಚಂದ್ರಗುತ್ತಿ ಕೋಟೆ. NikonD60 ಯಲ್ಲಿ ತೆಗೆದದ್ದು..

ಗುಡವಿ ಪಕ್ಷಿದಾಮ. NikonD60 ಯಲ್ಲಿ ತೆಗೆದದ್ದು..

ಚಂದ್ರಗುತ್ತಿಯಲ್ಲಿ. NikonD60 ಯಲ್ಲಿ ತೆಗೆದದ್ದು..(ನನ್ನ ಫೋಟೋ ನನ್ನದಲ್ಲ!!)

ನೆತ್ತಿಗೆ ಶುದ್ಧ ಕೊಬ್ಬರಿ ಎಣ್ಣೆ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Fri, 12 Jun 2009 07:27:00 +0000

ನೆತ್ತಿಗೆ ಶುದ್ಧ ಕೊಬ್ಬರಿ ಎಣ್ಣೆ,

ಕ್ರಾಪು ಬಾಚಿ, ಹಣೆಗೆ ಗಂಧ,

ಗಲ್ಲಕ್ಕೊಂದು ಕಪ್ಪಿಟ್ಟುಬಿಟ್ಟರೆ

ಸಿದ್ಧಳಾದಂತೆ ನೀನು.

ಬಯಲ ದಾರಿಯಲ್ಲಿ ನಡೆದು

ಬೆಟ್ಟದ ಮಲ್ಲಿಗೆ ಕೊಯ್ಯಲು ಹೋಗೋಣ.

.............

ಕಮಲದೆಲೆಯ ಮೇಲೆ ಮುತ್ತೊಂದು ಮಿನುಗುತಿದೆ,

ತಂದುಕೊಡಲೆ ನಿನಗೆ,

ಕಮಲದಳದಂತೆ ಮಿನುಗುತಿರೆ ನಿನ್ನ ಕಣ್ಣುಗಳು

ಬೆಳಕಾಯಿತು ನನಗೆ.

ಒಂದೇ ಪರಿಮಳವು ಸಂಧಿಸಿದೆ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Wed, 03 Jun 2009 06:39:00 +0000

ನಿಂಬೆ ತೋಟದಿಂದ ಬಂತು ಗಾಢ ಗಂಧ ಗಾಳಿಯಲಿ
ನನ್ನ ಪರಿಸರದ ತುಂಬ ಪಸರಿಸುತ್ತ
ನಿಂಬೆ ಬಣ್ಣದ ಹೆಣ್ಣೆ ನಂಬು ನನ್ನನು
ಸೋತು ಹೋದೆ ಪರದ ಪರಿಮಳಕ್ಕೆ

ಒಂದೇ ಪರಿಮಳವು ಸಂಧಿಸಿದೆ ನಮ್ಮನು
ಬಂಧಿಸಿದೆ ಒಂದೇ ಹೂವಿನ ಹಾರ

ಕವನದ ಜೀವ ಛಂದ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Wed, 20 May 2009 05:31:00 +0000

(ಒಂದು ಹಳೆ ಕವಿತೆ)

ಶಿಲಾಬಾಲಿಕೆಯಿವಳೆಂದೇ
ಪ್ರಾಸಬದ್ಧ ಕವನ ರಚಿಸತೊಡಗುತ್ತೇನೆ
ಅವಳಂತೆಯೇ ಒಪ್ಪ, ಓರಣ, ಚಂದ- ಈ ಛಂದ ಎಂದು.

ಕಟ್ಟುಗಳಿಗೆ, ಬೇಲಿಗಳಿಗೆ ಒಗ್ಗಿ ನಿಲ್ಲುವುದಿಲ್ಲ
ಉಕ್ಕಿ, ರೆಕ್ಕೆ ಚಿಮ್ಮಿ ಆಗಸದೆಡೆ,
ಬೆರಗುಗೊಳ್ಳುವಂತೆ ನೋಡುತ್ತಿರೆ
ಹರಿಯುತ್ತದೆ ಇವಳ ಹೃದಯ

ಹಕ್ಕಿಭಾವದಲಿ ಹಾರಿ, ನೀರಭಾವದಲಿ ಹರಿದು,
ಸುಮಭಾವ ಅರಳಿ, ಹಿಮಭಾವ ಕರಗಿ,
ಘಮಭಾವ ಘಮಿಸಿ, ಶಿವಭಾವ ನಮಿಸಿ,
ಕಿವಿಯಿಲ್ಲದೆಡೆ ಸ್ವಗತ, ಕಣ್ಣಿಲ್ಲದೆಡೆ ಸ್ವಚ್ಛಂದ,
ತಾನು ತಾನಾಗಿ ಸತ್ಯದೆಡೆಗೆ ಅಡಿಯಿಡುತ್ತಾಳೆ

ಛಂದಗಳು ಬಂಧಿಸದ ಇವಳ
ಹೆಜ್ಜೆ ಸಾಲುಗಳ ಹಿಂದೆ ಕಣ್ಣರಳಿಸಿ ನಡೆಯುತ್ತೇನೆ
ಕವಿತೆ ನದಿಯಾಗುತ್ತದೆ.

ಈ ಓಟದಲ್ಲೂ ನಯವಿದೆ, ಲಯವಿದೆ,
ಚಂದವಿದೆ, ಸಂಸ್ಕೃತಿಯ ಬಂಧವಿದೆ.
ಎಷ್ಟೇ ಅಲೆದರೂ
ಈ ಕವನದ ಜೀವ ಛಂದವಿದೆ.

ನೀಡಿ ನೀಡದೇ ಉಳಿದುದು

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Mon, 18 May 2009 04:52:00 +0000

ನೀಡಿದ ಮುತ್ತು ಉಳಿಯಿತು ನಿನ್ನ ಕೆನ್ನೆಯಲಿ
ನೀಡದ ಮುತ್ತು ಹರಡಿತು ಬಾನ ಅಗಲಕ್ಕೆ,
ನಿನ್ನನೇ ತಲುಪುವ ಹಂಬಲದಲಿ ಅರಳಿತು,
ನೀಡಿದ ಮುತ್ತಿಗೆ ಆಕಾರ ನೀನು
ನೀಡದ ಮುತ್ತಿಗೆ ನಿರಾಕಾರ

ನೀಡದ ಮುತ್ತು ನನ್ನಲ್ಲಿ ಉಳಿದು
ಎಲ್ಲ ದಿಕ್ಕಿಗೂ ಹರಿವಾಗ
ಅರಿವಾಗುವುದು ನನಗೆ ನನ್ನದೇ ಒಲವಿನ ಹರವು

ಒಂದು ಮುತ್ತೇ ಹರಡಿ
ಭೂಮಿ ಬಾನನೆಲ್ಲ ನನ್ನದಾಗಿಸುವುದು
ನನ್ನ ಒಲವಿಗೆ ಹೊಸ ದಿಕ್ಕು ನೀಡುವುದು
ನಿನ್ನ ನಿರಾಕಾರ ರೂಪಿಯಾಗಿಸುವುದು
ನನ್ನ ಉಕ್ಕಿಸಿ ಮಿತಿಮೀರಿಸುವುದು

ಮುತ್ತು ಒಲವಿನ ಮಾತು,
ಸಾಗರಕೆ ಅಲೆಯಂತೆ ಹೊಂದಿಹುದು
ಮುತ್ತನಿಡಲೇ ಸಾಗರದ ಒಲವು ಉಕ್ಕುವುದು

ನೀಡಿದ ಒಲವು ದಿಕ್ಕು ದಾರಿಯಲಿ ಸಾಗುವುದು
ನೀಡದ ಒಲವೇ ಆಗಸಕ್ಕೆ ಹಾರುವುದು.

ದೋಣಿ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Mon, 13 Apr 2009 03:18:00 +0000

ಬೆಟ್ಟದಿಂದ ಮೆಲ್ಲಗೆ ಜಾರುತ್ತಿದೆ ಮಳೆ,

ಕಾಲುವೆಯಾಗಿ ಮನೆಯ ಮುಂದೆ ಹರಿವಾಗ

ದೋಣಿಯ ನೆನಪಾಗುತ್ತದೆ ಅವಳಿಗೆ...

ಅಂಬಿಗನಿಲ್ಲದೇ ಇರುವಾಗ

ಸುಮ್ಮನೇ ಇದ್ದಲ್ಲಿಯೇ ತೇಲುತ್ತದೆ ದೋಣಿ.

ಅರಳನೇ ಬಯಲಲ್ಲಿ ಬಯಲಾದ ರಾಮ?

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Tue, 07 Apr 2009 06:23:00 +0000

ಬೆಲೆವೆಣ್ಣುಗಳ ಸಂಗದಲಿ

ರಾಮಾನುರಾಗ ಮೊಳೆಯುವುದು

ಜೋಕಾಲಿಯಾಡುತ್ತದೆ ಬದುಕು

ವಿರುದ್ಧಕ್ಕೆಳೆಯುವುದು ಮನಸು

ಮಂಗಳಾರತಿ ಹೊತ್ತಿಗೆ ಮೊಲೆಗನಸು.

ಸಂಪ್ರದಾಯ ಸರಿತೆ ನಿಶ್ಚಲ, ಕೊಳೆಯುವುದು.

ಸುವರ್ಣಪಾತ್ರೆಯೊಳಗೆ ಸತ್ಯ ಮುಚ್ಚಿಹುದು

ಕಣ್ಮುಚ್ಚಿಹನು ಸುವರ್ಣಕೋಟೆಯ ಸುಖದಲಿ

ಯುದ್ದವಿಲ್ಲದೇ ಗೆಲ್ಲಲಾರ, ದಾರಿಯಿಲ್ಲದೇ ನಡೆಯಲಾರ

ಹೆಗಲ ಹೆಣಭಾರವಿಳಿಸಿ ಹಗುರಾಗಲಾರ.

ದಿವದ ಮಳೆಸುರಿದು ಕೊಚ್ಚಿಹೋಗದೆ ಕಾಮಮೂರ್ತಿ

ಅರಳನೇ ಬಯಲಲ್ಲಿ ಬಯಲಾದ ರಾಮ?

ಯುವ ಕವಿ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Mon, 06 Apr 2009 06:08:00 +0000

ಕನ್ನಡದ ಎಲ್ಲ ಯುವ ಕವಿಗಳನ್ನು ಒಂದು ಗೂಡಿಸಲು ವೇದಿಕೆಯಾಗಿ ಯುವ ಕವಿ ಯನ್ನು ಪ್ರಾರಂಭಿಸುತ್ತಿದ್ದೇವೆ. ಕನ್ನಡದ ಎಲ್ಲ ಕವಿಗಳು ಮತ್ತು ಕಾವ್ಯ ಪ್ರೇಮಿಗಳು ಜೊತೆಸೇರಿ ಕಾವ್ಯವನ್ನು ಓದೋಣ, ಕಾವ್ಯವನ್ನು ಚರ್ಚಿಸೋಣ. ನಮ್ಮೊಡನೆ ಸೇರಿ..

ಯುವ ಕವಿ ಕನ್ನಡದ ಕಾವ್ಯವೇದಿಕೆ.

ಒಲಿದ ಮೇಲೆಯೇ ಅಲ್ಲವೇನೆ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Tue, 17 Mar 2009 04:30:00 +0000

ದೇಗುಲದಲ್ಲಿ ಅಪ್ಪಿದಾಗ ಬಳುಕುತ್ತಿದ್ದೆಯಲ್ಲ,
ನಿನ್ನಲ್ಲಿ ನಾಚಿಕೆಯೂ, ಒಪ್ಪಿಗೆಯೂ
ಒಟ್ಟೊಟ್ಟಿಗೇ ತುಳುಕುತ್ತಿದ್ದವು ಅಲ್ಲವೇನೆ?

ಬಳುಕೊ ಜಲಪಾತವ ಬರಸೆಳೆದು
ಕಾಯುವಂತೆ ಹುಟ್ಟುವ ಭಾವಗಳಿಗೆ
ಎಲ್ಲಿಂದಲೋ ತುಳುಕುವ ಸಾಲುಗಳಿಗೆ
ಕಾದು ಹದವಾಗುವುದೆ ಕವಿತೆ.

ಎದೆಯ ಹೂಕಾಡು ಮಾಲೆಯಾದಂತೆ
ಕವಿತೆಯೂ, ಒಲವೂ ಅರಳುವುದು
ಹೇಳಲಾಗುವುದಷ್ಟೆ ಎದೆಯಲ್ಲಿ ಉಳಿಯುವುದು
ಹೇಳಲಾಗದ್ದು ಆಗಸಕ್ಕೆ ತೆರಳುವುದು.

ಒಲಿದ ಮೇಲೆಯೇ ಅಲ್ಲವೇನೆ
ಎಲ್ಲ ತುಳುಕುವುದು, ಬಳುಕುವುದು?

ನಿನಗೆ ಮಾತ್ರ ಯಾವ ಭಾವವೂ ತಲುಪುವುದಿಲ್ಲವೇ?

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Mon, 12 Jan 2009 09:01:00 +0000

ಆತ್ಮದ ಗೆಳತಿ ಎನ್ನಲೇ ನಿನ್ನ?

ಒಂದು ಮಾತಿಲ್ಲ, ಒಂದು ನೋಟವಿಲ್ಲ

ನನ್ನಷ್ಟಕ್ಕೇ ನಾನೇ ಮಾತನಾಡಿಕೊಳ್ಳುತ್ತೇನೆ

ನಿನ್ನ ಮಾತುಗಳನ್ನೂ!

ನಿನ್ನ ಹೆಸರು ನನ್ನ ಹೃದಯದ ಕಣಿವೆ ತುಂಬ

ಮಾರ್ದನಿಗೊಳ್ಳುತ್ತ ಪುಲಕ ತರುತ್ತದೆ.

ಮಾತಾಗದ ಭಾವಗಳೆಲ್ಲ ಪಲ್ಲವಿಸುತ್ತವೆ

ನಿನ್ನ ಕಂಗಳ ರೆಪ್ಪೆಗಳೊಮ್ಮೆ ಕದಲಿದರೂ ಸಾಕು

ಉಕ್ಕೇರುತ್ತದೆ ಶರಧಿ ಚಂದ್ರನೆಡೆಗೆ.

ನನ್ನ ಆತ್ಮದ ಸಖ್ಯಕ್ಕೆ ನಿನ್ನ ನಾಮ ಮತ್ತು ಭಾವರೂಪ

ನನ್ನ ಯಾತನೆಗೆ, ಸಂಭ್ರಮಕ್ಕೆ ನಿನ್ನದೇ ನೆನಪುಗಳ ಮಾಲೆ.

ನಿನಗೆ ಮಾತ್ರ ಯಾವ ಭಾವವೂ ತಲುಪುವುದಿಲ್ಲವೇ?

ದೂರದಲ್ಲೊಂದು ತಾರೆ ಮಿನುಗುತ್ತಲೇ ಇರುತ್ತದೆ;

ಹೆಜ್ಜೆ ಮೇಲೆ ಹೆಜ್ಜೆ ಇಟ್ಟು, ನಿನ್ನ ದಾರಿಯಲ್ಲಿ

ನೀನು ನಡೆಯುತ್ತಲೇ ಇರುತ್ತೀಯ.....!

ಅರ್ಧ ಕಣ್ತೆರೆದಿರುವ ಹೊತ್ತು..

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Mon, 05 Jan 2009 03:51:00 +0000

ಆಕೆಯೀಗ ಅರ್ಧ ಕಣ್ಣನ್ನಷ್ಟೇ ತೆರೆದಿದ್ದಾಳೆ

ಅದಕ್ಕೆಂದೇ

ಹಕ್ಕಿಯೊಂದು ಹೊರಕ್ಕೆ ಕತ್ತು ಚಾಚಿ

ಅತ್ತ ಇತ್ತ ನೋಡಿ

ಮತ್ತೆ ಕಣ್ಮುಚ್ಚುತ್ತದೆ

ಯಾವಾಗ ಮಗ್ಗಲು ಬದಲಾಯಿಸಿತೋ ಗೊತ್ತಿಲ್ಲ

ನಿಷಾಮಾತೆಯ ಮಡಿಲಿಂದ

ಉಷೆಯ ಮಡಿಲಿಗೆ

ಆಕೆ ಪೂರ್ತಿ ಕಣ್ಣು ತೆರೆದರೆ

ಗೂಡು ಬಿಡಲು ಸಮಯವಾಯಿತೆಂದೇ

ಹಾರಬೇಕು ಕುಟುಕು, ಕಾಳಿಗಾಗಿ

ನಿದ್ದೆಯೆಂದರೆ ಮತ್ತೆ ಮಗುವಾದಂತೆ

ಅರ್ಧಕಣ್ಣು ತೆರೆದಾಗ

ಜಗತ್ತು ಕರಗುತ್ತದೆ ಸಕ್ಕರೆಯಂತೆ

ನೋವು-ನಲಿವುಗಳೆಲ್ಲ

ಒಂದೇ ಗಿಡದ ಹೂವು-ಮುಳ್ಳುಗಳಾಗುತ್ತವೆ

ಮತ್ತೆ ಇಬ್ಬನಿ ತನ್ನಷ್ಟಕ್ಕೆ ಹರಡುತ್ತದೆ

ಕಿರಣಗಳೆದುರಿಗೆ ಕರಗುತ್ತದೆ
ಆಕೆ ಅರ್ಧ ಕಣ್ಣನ್ನಷ್ಟೇ ತೆರೆದಿದ್ದಾಳೆ

ಹಕ್ಕಿ ಕಣ್ಮುಚ್ಚಿ ಕುಳಿತಿದೆ

ಎಚ್ಚರದಲ್ಲಿಯೇ

ಸಂತಸದ ಅಲೆ ಸಾಗರದ ತುಂಬ

ಏರುತ್ತಿದೆ, ಇಳಿಯುತ್ತಿದೆ

ಯಾವ ದಿಕ್ಕಿಗೆ ನಡೆದರೂ...

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Tue, 30 Dec 2008 03:12:00 +0000

ಕಿರಣಗಳೊಡೆಯುತ್ತವೆ ಎರೆಡೆರಡಾಗಿ
ಸುರಿಯುತ್ತವೆ ಅತ್ತ ನಿನ್ನ ಮೇಲೆ,
ಇತ್ತ ನನ್ನ ಮೇಲೆ.
ಎರೆಡು ಹೆಜ್ಜೆ ನೀನಿಡುವ ಹೊತ್ತಿಗೆ
ಗರಿಕೆಗಳ ಗಂಧ ಹರಡುತ್ತದೆ ಗಾಳಿಯಲ್ಲಿ
ಆವರಿಸುತ್ತದೆ ನನ್ನ, ನಿನ್ನ
ಕಾಲದಂತೆ ಅವಕಾಶವೂ ಕರಗುತ್ತದೆ,
ಉಳಿಯುವುದಿಲ್ಲ ನನ್ನ ನಿನ್ನ ನಡುವಿನ ಅಂತರ.

ಬಿಲ್ವಪತ್ರೆಯಿನ್ನೂ ಚಿಗುರುತ್ತಿರಬೇಕು ಅಲ್ಲವೇನೆ?
ಮಂಗಳಾರತಿ ಮುಗಿಸಿಕೊಂಡು ಹೊರಗೆ ಕಾಲಿಟ್ಟ
ನಿನ್ನ ಕಣ್ಣಲ್ಲೇನು ನಂದಾದೀಪ?
ಎಷ್ಟು ದೂರದವರೆಗೆ ಹಿಂಬಾಲಿಸುತ್ತದೆ ನಿನ್ನ
ಆ ಕರ್ಪೂರದ ಕಂಪು?

ಸುಮ್ಮನೇ ಹಿಂತಿರುಗಿ ನೋಡಬೇಡ,
ನಾನೇನೂ ಹಿಂಬಾಲಿಸುತ್ತಿಲ್ಲ.
ಬೆಟ್ಟದ ಮೇಲೆ ಮಲ್ಲಿಗೆಗಳರಳುತ್ತಿವೆ.
ಕಂಪಿನ ಕರೆಗೆ ಸೋತು ಹೆಜ್ಜೆ ಹಾಕುತ್ತಿದ್ದೇನೆ.
ಪ್ರೇಮವೆಂದರೆ ದೈವಿಕ ಕಂಪು,
ಯಾವ ದಿಕ್ಕಿಗೆ ನಡೆದರೂ
ತಲುಪಿಸುತ್ತದೆ ನಿನ್ನ ಕಡೆಗೇ...!

ಇದೆಲ್ಲ ಸಂಭ್ರಮದ ಅಭೀಪ್ಸೆ...

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Tue, 04 Nov 2008 04:00:00 +0000

ಆತ್ಮಗುಣಾಭಿಮಾನಿನಿ,

ಹೀಗೆಂದು ಕರೆಯಲೇ ನಿನ್ನ?

ಯಾವ ಒತ್ತಾಯಕ್ಕೂ ನೀನು ಒಲಿಯುವುದಿಲ್ಲ,

ನಿನ್ನ ಹೃದಯದಲ್ಲಿ ಅರಳದಿರುವುದರ ಕುರಿತು

ನೀನು ಮಾತೇ ಆಡುವುದಿಲ್ಲ.

ಬೆಟ್ಟದಂಚಲ್ಲಿ ಕಾಡು ಮಲ್ಲಿಗೆಗಳರಳಿವೆ,

ಕಂಪಿಗೆ ಸೋತು ಸುತ್ತುತ್ತೇನೆ,

ಜೇನುಗಂಪು ಕಾಡಿನ ತುಂಬ ತುಂಬಿದೆ

ಅಲೆಯುತ್ತೇನೆ...

ಅಲ್ಲೆಲ್ಲೂ ನೀನು ಕಾಣುವುದಿಲ್ಲ.

ಈ ಹುಡುಕಾಟವೆಲ್ಲ ಲೀಲೆಯಂತೆ,

ಈ ಅಲೆದಾಟವೆಲ್ಲ ರೆಕ್ಕೆಬಿಚ್ಚಿ ಹಾರಿದಂತೆ.

ಇದೆಲ್ಲ ಸಂಭ್ರಮದ ಅಭೀಪ್ಸೆ...

ನನಗೆ ಗೊತ್ತು, ನೀನಿರುವುದು ನನ್ನಲ್ಲಿಯೇ ಎಂದು.

ಬೆಟ್ಟಬನಗಳಲ್ಲಿ ಹುಡುಕುವಾಗ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Tue, 04 Nov 2008 03:54:00 +0000

ಓರೆನೋಟ ಬೀರುವುದಿಲ್ಲ ಆಕೆ,

ನೆಟ್ಟನೋಟ, ದಿಟ್ಟಮಾತು

ಸಿಡಿಲುಬಂದು, ಮಳೆ ಸುರಿದು ಮತ್ತೆ ಶಾಂತ.

ತೊಯ್ದವನ ಪಾಡು ಆಕೆಗೆ ಗೊತ್ತಾಗುವುದಿಲ್ಲ.

ಬೇಸಿಗೆಯಲ್ಲಿ ಬೆಂದ ಭೂಮಿಯಿಂದ

ಮೊದಲ ಮಳೆಗೆ ಮೇಲೆದ್ದ ಗಂಧ

ದಿಕ್ಕುದಿಕ್ಕುಗಳಿಗೆ ಪಸರಿಸುವಾಗ

ಆತ್ಮದ ಒಳಹೊಕ್ಕು ಹಸಿರಿಸುವಾಗ

ಚೈತ್ರಗಂಧಿಗೀ ನಲಿವು ಗೊತ್ತಾಗುವುದಿಲ್ಲ.

ಬೆಳ್ಳಿಗೆಜ್ಜೆಗೆ ಸೋತು

ಬೆಟ್ಟಬನಗಳಲ್ಲಿ ಹುಡುಕುವಾಗ

ಅಟ್ಟದಲೋ, ಕಟ್ಟೆಯಲೋ

ಬರಿದೆ ಕುಳಿತಿರುತ್ತಾಳೆ.

ಆಗಸವನ್ನೆಲ್ಲ ಬಿಳಿಮೋಡದಿಂದ ತುಂಬಿಸುತ್ತಾಳೆ

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Tue, 04 Nov 2008 03:48:00 +0000

ಆಗಸದಲ್ಲೊಂದು ಮೋಡ
ಚಿಟ್ಟೆಯ ಆಕಾರ ತಳೆದು
ತೇಲುತ್ತ, ಹರಡುತ್ತ
ಚದುರಿಹೋಗುತ್ತದೆ.

ನೋಡುತ್ತಾಳೆ ಕಣ್ಣರಳಿಸಿ,
ತೆರೆದುಕೊಳ್ಳುತ್ತದೆ ಬಾಲ್ಯ,
ಹಸಿರು ದಾರಿಯಲ್ಲಿ ನಡೆದು,
ಹೂಗಂಧ ಹರಡಿರುವ
ಬಯಲಕಂಪಿಗೆ ದೀರ್ಘ ಉಸಿರೆಳೆದುಕೊಂಡಿದ್ದು..
ಆಟವಾಡುವ ಚಿಟ್ಟೆಗಳ ಹಿಂದೆ ಓಡಿದ್ದು,
ಅರಿಶಿಣಬಣ್ಣವೆಲ್ಲ ಚಿಟ್ಟೆಯಿಂದುದುರಿ
ಕೈಗಳು ಬಣ್ಣಬಣ್ಣವಾಗಿದ್ದು.
ಚಿಟ್ಟೆಯ ಚೈತನ್ಯ ತನ್ನೊಳಗೆ ಸೇರಿ
ಆಕೆ ಚಿಟ್ಟೆಯೇ ಆಗಿ ಮನೆಗೆ ಮರಳಿದ್ದು.

ನೆನೆಯುತ್ತಾಳೆ,
ಚಿಟ್ಟೆಯೇ ಕೈಮೇಲೆ ಕುಳಿತಂತೆ ಪುಲಕಗೊಳ್ಳುತ್ತಾಳೆ.

ಕಾಡಿನ ದಾರಿಯಲ್ಲಿ ಸಾಗುತ್ತೇನೆ,
ಬೆಟ್ಟದಂಚಿನ ಮಲ್ಲಿಗೆ ಬನದಲ್ಲಿ ಚಿಟ್ಟೆಗಳ ಸಂತೆ,
ಏನೋ ಮಾತು, ಏನೋ ಸಂಭ್ರಮ.
ಕಲ್ಪಿಸಿಕೊಳ್ಳುತ್ತೇನೆ, ಆಕೆ ಇಲ್ಲಿ ನಡೆದಾಡಿದಂತೆ.

ಮೋಡದ ತುಣುಕುಗಳೇ ಅರಳಿ ಆಗಸಕ್ಕೆ ಸೇರುವಂತೆ
ಬೂರುಗ ಮರದ ಕಾಯಿಗಳಿಂದ ಅರಳುತ್ತಿದೆ ಅರಳೆ.
ನೆಲಕ್ಕೆ ಬಿದ್ದ ಕಾಯನ್ನು ಎತ್ತಿಕೊಳ್ಳುತ್ತೇನೆ,
ಅರಳೆಯನ್ನೆಳೆದು ಆಗಸಕ್ಕೆ ಹಾರಿಸುತ್ತೇನೆ,
ಅದು ಹಾರುತ್ತ ಸಾಗಿ ಮೋಡವನ್ನು ಸೇರಿಕೊಳ್ಳುತ್ತದೆ.

ಅವಳ ಕೈಗೆ ಅರಳೆಯನ್ನಿಟ್ಟರೆ ಎಷ್ಟು ಸಂಭ್ರಮಿಸುತ್ತಾಳೆ,
ಆಗಸವನ್ನೆಲ್ಲ ಬಿಳಿಮೋಡದಿಂದ ತುಂಬಿಸುತ್ತಾಳೆ,
ಕಲ್ಪಿಸಿಕೊಳ್ಳುತ್ತ ಪುಲಕಗೊಳ್ಳುತ್ತೇನೆ.

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Thu, 25 Sep 2008 07:06:00 +0000

mild.winters@gmail.com (ರಾಘವೇಂದ್ರ ಮಹಾಬಲೇಶ್ವರ) — Mon, 10 Mar 2008 06:02:00 +0000

ಮೋಡ ತನ್ನಷ್ಟಕ್ಕೇ ಕದಲುವುದಿಲ್ಲ

ಸೂರ್ಯರಶ್ಮಿಗಳನ್ನೂ ಕದಲಿಸುತ್ತದೆ

ಮರದ ನೆರಳನ್ನೂ ಕದಲಿಸುತ್ತದೆ

ನೆರಳನ್ನೇ ದಿಟ್ಟಿಸುತ್ತಿದ್ದವಳು

ಕಣ್ಣನ್ನು ಕದಲಿಸುತ್ತಾಳೆ.

ಎಲ್ಲಿ ಹೋಗಿತ್ತು ಮನಸ್ಸು

ಒಂದು ಮುಗುಳ್ನಗೆಯೊಂದಿಗೆ ಮರಳಿ ಬಂತು.

ನಿನ್ನೆಯೆಲ್ಲ ಉರಿವ ಬಿಸಿಲು,

ಸಂಜೆಯ ಹೊತ್ತಿಗೆ

ಚೆಂಡುಹೂಗಳ ಕಂಪು ಬೀಸಿ ಬರುತ್ತಿತ್ತು,

ಬಲಿಯತೊಡಗಿವೆ ಬತ್ತದ ಕಾಳುಗಳು

ಪೈರುಹಸಿರೆಲ್ಲ ಬಣ್ಣ ಬದಲಿಸುತ್ತಿದೆ,

ಲಂಗವನ್ನೊದೆಯುತ್ತ ನಡೆದವಳ ಸುತ್ತ

ಚಿಟ್ಟೆಗಳ ದಂಡು.

ನೀಲಿಯಲ್ಲಿ ತೇಲುತ್ತಿದ್ದವು ಮೋಡಗಳು

ಪಶ್ಚಿಮದಂಚಿನಲ್ಲಿ ಬಣ್ಣ ಚೆಲ್ಲಿತ್ತು.

ಒಂದೊಂದೆ ಹೆಜ್ಜೆಯಿಡುತ್ತಿದ್ದಳು,

ಕಣ್ಣರಳಿಸುತ್ತಿದ್ದಳು.

ಯಾವುದೋ ಕಂಪು ಕರೆದಂತೆ,

ಯಾವುದೋ ತಂಪು ತೆರೆದಂತೆ,

ಯಾವುದೋ ಸೊಂಪು ಸೆಳೆದಂತೆ,

ರೂಪವಿಲ್ಲದವನು ದನಿಮಾಡದೆ ಕರೆದಂತೆ

ಬೆರಗುಗೊಳ್ಳುತ್ತಾಳೆ, ಬಣ್ಣಗೊಳ್ಳುತ್ತಾಳೆ.

ಸೆಳೆಯುತ್ತಿದೆ ಇನ್ನೂ ಅದೇ ಭಾವ,

ಏನದು ತುಂಬಿತಲ್ಲ ನನ್ನ ತುಂಬ,

ಕೇಳಿಕೊಳ್ಳುತ್ತ ಕಳೆದುಹೋಗುತ್ತಾಳೆ.

ಹೊರಗೆ ಬಿಸಿಲು ಕದಲುತ್ತದೆ, ನೆರಳು ಕದಲುತ್ತದೆ

ಕಣ್ಣು ಕದಲುತ್ತದೆ, ಮರಳಿಬರುತ್ತಾಳೆ.